Julius og Rógvi tendra jólatræið

Jólini vera skotin í gongd síðsta leygardag í november, tá vit tendra jólaljósini kring býin og tendra træið á Vaglinum.
Hundraðtals fólk savnast at síggja hesa løtuna og at lurta eftir hugnaliga jólahorntónleikinum.

Julius og Rógvi koma at hjálpa at tendrað ljósini, men gloym alt um reinsdjór og sletu – í Havnini koma teir í einum gomlum, reyðum sløkkiliðsbili.
Teir fara upp eftir stiganum hjá sløkkiliðnum, og tá fjøldin hevur rópt gandorðið, tendrar Julius ljósini – og so lýsir bæði træið og býurin.

Tá jólatræið er tendrað spælir Ælabogin í Betri garðinum.
Umleið kl. 16.30 kunnu allar nissur fara yvir til pavillionina uttanfyri Ráðhúsið, tí tá verður Nissudisko! Beinta Haraldsen diskar. Bæði stórar og smáar nissur eru vælkomnar.